Page 3 - Иван Ногиев (Парма Вань) - Евлог да сылöн ёртъяс
P. 3
Некод, дерт, эз тöд. Та вöсна Шурик ачыс вочавидзис:
— Майкл! Вот мый колö лыддьыны!
Челядь шызисны, кодсюрö серöктiсны.
— Сiйö мый на, гижöма кö — Манчестер, колö лыддьыны — Ливерпуль.
— Мый нö тайö англичанаыс, дзик йöйöсь али мый? — чуймис Евлог.
— Абу нин, дерт, ёна сюсьöсь. Французъяслöн сiдз жö нинöм он гöгöрво.
Гижöны — Аугер, лыддьöны — Оже. Да нöшта найö пыскыльтöны посни кага-
яс моз, оз артмы налöн «ры»-сö шуöмыс. Немечьяслöн неуна кокниджык, налöн
кöть позьö мыйкö да мыйкö гöгöрвоны. Шуам, штуль — сiйö лоö улöс. Рочьяслöн
моз жö. А тюр — öдзöс.
Челядь бара серöктiсны.
— Мун пö татысь тюр.
— Рочьяслöн öд эм жö сэтшöмыс, гижöма — кого, его, а лыддьöны — ково,
ево.
Евлог кывзiс Шуриклысь висьталöмсö да ас кежас мöвпалiс, мый гырысь
классъясын кутас велöдны немецкöй кыв, мед война кö пансяс, сiйöс мöдöдасны
враг тылö разведчикöн. Кутас ветлöдлыны фашистъяс пöвстын немецкöй фор-
маöн да тöдмавны налысь гусяторъяссö. Ковмас, дерт, бура велöдчыны, мед сö-
мын шлочкыны-сёрнитны на ногöн.
Серпасалic Ракина Арина, Дереваннöй сикт. И друг юрас сылы воис мöвп: «А ми öд, комиясыд, кыдзи гижам, сiдзи и лыд-
дям. Артмö, мый комияс — медсюсьöсь!»
Таысь детинкалöн ичöтик сьöлöмыс тыри ыджыд радлунöн. Збыль öд, мыйтта
йöз мирас, а некод абу гöгöрвоöма гижны сiдзи, кыдзи сёрнитö. А вот найö —
комияс, мед кöть и этшаникöнöсь, абу кыпöдчысьöсь, а кужöмаöсь вöчны сэтшöм
прöстöйтор, мый колö гижны сiдзи, кыдзи лыддян, а лыддьыны, кыдзи гижан.
3